ವೃತ್ತಿಯಲ್ಲಿ ರೇಷ್ಮೆ ಪ್ರದರ್ಶಕ. ಕಲೆ, ಸಾಹಿತ್ಯ, ಸಂಗೀತ, ಕ್ರೀಡೆಯಲ್ಲಿ ತಮ್ಮನ್ನು ತಾವು ತೊಡಗಿಸಿಕೊಂಡು ಅವರ ಉಳುವಿಗಾಗಿ ಶ್ರಮಿಸುತ್ತಿರುವ ಎಚ್.ವಿ. ಹನುಮಂತು ಬಹುಮುಖ ಪ್ರತಿಭೆ. ಹಲವು ಸುಪ್ರಸಿದ್ಧ ಕವಿಗಳ ಗೀತೆಗಳಿಗೆ ರಾಗ ಸಂಯೋಜಿಸಿ ಜೀವ ತುಂಬಿದ್ದಾರೆ. ರಾಜ್ಯ ಮಟ್ಟದ ಜನಪದ ಮತ್ತು ಭಾವಗೀತೆ ಗಾಯನ ಪ್ರಶಸ್ತಿ ತಮ್ಮ ಮುಡಿಗೇರಿಸಿಕೊಂಡಿದ್ದಾರೆ. ಅತ್ಯುತ್ತಮ ಕ್ರೀಡಾಪಟುವಾಗಿಯೂ ಹೊರಹೊಮ್ಮಿದ್ದಾರೆ. ಕಾಗದದ ಮೇಲೆ ಉಗುರಿನಿಂದ ಉಬ್ಬು ಕಲಾಕೃತಿಗಳನ್ನು ಬಿಡಿಸುವ ಇವರು ಅದ್ಬುತ ಚಿತ್ರಕಲಾವಿದರೂ ಹೌದು. 

ಮೂಲತಃ ರಾಮನಗರದವರೆ ಆದ ಹನುಮಂತು ಕೋಲಾರ ಜಿಲ್ಲೆಯ ಮುಳಬಾಗಿಲಿನ ರೇಷ್ಮೆ ಇಲಾಖೆಯಲ್ಲಿ ಸೇವೆ ಸಲ್ಲಿಸುತ್ತಿದ್ದಾರೆ. ರಾಮನಗರ ರಂಗಭೂಮಿ ಸೊರಗುತ್ತಿರುವ ಸಂದರ್ಭದಲ್ಲಿ ನಟರಾಗಿ, ನಾಟಕಕಾರರಾಗಿ ಹಲವು ಸುಪ್ರಸಿದ್ದ ನಾಟಕಗಳನ್ನು ನಿರ್ದೇಶಿಸಿ ರಂಗಭೂಮಿಗೆ ಹೊಸ ಚೈತನ್ಯ ತುಂಬಿದ ಇವರು ಐವತ್ತಕ್ಕೂ ಹೆಚ್ಚು ಕಲಾವಿದರನ್ನು ರಂಗಭೂಮಿಗೆ ಪರಿಚಯಿಸಿದ್ದಾರೆ. 

ಕುಡಿತದ ಸಹಾವಾಸ, ಸಂಸಾರ ಸ್ವರ, ಮರಳಿ ಬಂದ ಭಾಗ್ಯ, ಕಿತಾಪತಿ ಶಾಮಣ್ಣ, ಹಳ್ಳಿಯ ಭೂತ, ರಂಗಾದ ಮುನಿಯ, ಕಿವುಡರ ಸಹವಾಸ ಹೀಗೆ ಒಟ್ಟು ಏಳು ನಾಟಕಗಳನ್ನು ರಚಿಸಿದ್ದಾರೆ.

1980ರಲ್ಲಿ ಹತ್ತನೇ ತರಗತಿಯಲ್ಲಿ ವ್ಯಾಸಾಂಗ ಮಾಡುತ್ತಿದ್ದ ಸಂಧರ್ಭದಲ್ಲಿ. ಓದು, ಕಲೆ, ಕ್ರೀಡೆ, ಹೀಗೆ ಎಲ್ಲಾ ಕ್ಷೇತ್ರಗಳಲ್ಲಿ ಗುರುತಿಸಿಕೊಳ್ಳುವ ಹಂಬಲದಿಂದ ಶಾಲೆ ಕಾಲೇಜಿನಲ್ಲಿ ಜರುಗುತ್ತಿದ್ದ ರಾಜ್ಯ ಮಟ್ಟದ ನಡೆಯುತ್ತಿದ್ದ ಎಲ್ಲಾ ಸಾಂಸ್ಕøತಿಕ ಮತ್ತು ಕ್ರೀಡಾ ಚಟುವಟಿಕೆಗಳಲ್ಲಿ ಭಾಗವಹಿಸುತ್ತಿದ್ದೆ. ಹೀಗಾಗಿ ಹಲವು ಕ್ಷೇತ್ರಗಳಲ್ಲಿ ಗುರುತಿಸಿಕೊಂಡು ಪ್ರಶಸ್ತಿ ಪಡೆದಿದ್ದೇನೆ ಎಂದು ಅವರು ಹೇಳುತ್ತಾರೆ.

ಹತ್ತನೇ ತರಗತಿಯಲ್ಲಿ ವ್ಯಾಸಂಗ ಮಾಡುತ್ತಿದ್ದಾಗ ಶಾಲೆ ವಾರ್ಷಿಕೋತ್ಸವದಲ್ಲಿ ಚಿಕ್ಕ ನಾಟಕವೊಂದರಲ್ಲಿ ಅಭಿನಯಿಸಬೇಕು ಎಂಬ ಆಸೆ ಇತ್ತು. ಸೂಕ್ತ ನಾಟಕದ ಆಯ್ಕೆಗೆ ಪ್ರಯತ್ನಿಸಿದರೂ ಹಣ ಕೊಟ್ಟು ಕೃತಿ ಖರೀದಿಸಲು ಸಾಧ್ಯವಾಗಲಿಲ್ಲ. ಆದರಿಂದ ಸ್ವತಃ ನಾಟಕ ರಚನೆಗೆ ಮುಂದಾದೆ. ಪೆನ್ನು ಹಾಳೆ ಹಿಡಿದು ಕುಳಿತಾಗ ಯಾವ ವಿಷಯದ ಮೇಲೆ ನಾಟಕ ರಚನೆ ಮಾಡಬೇಕೆಂಬ ಸಂದಿಗ್ದತೆಯ ನಡುವೆ ಅಂದು ಕಣ್ಣ ಮುಂದೆ ಸುಳಿದಿದ್ದು, ಕುಡಿತದ ಹಾವಳಿಯಿಂದ ತತ್ತರಿಸಿದ್ದ ಹಲವು ಕುಟುಂಬಗಳ ದುಸ್ಥಿತಿಯ ಚಿತ್ರಣ. ಅದರ ಮೇಲೆಯೇ ಪಾತ್ರಗಳನ್ನು ಸೃಷ್ಠಿಸಿ ‘ಕುಡಿತದ ಸಹವಾಸ’ ಎಂಬ ಸಾಮಾಜಿಕ ನಾಟಕವನ್ನು ಹಣೆದು ಸಹಪಾಠಿಗಳೊಂದಿಗೆ ತಾಲೀಮು ನಡೆಸಿ ಶಾಲೆಯ ವಾರ್ಷಿಕೋತ್ಸವ ಕಾರ್ಯಕ್ರಮದಲ್ಲಿ ಪ್ರದರ್ಶನ ನೀಡಿದೆವು. ಆ ನಾಟಕವು ಶಾಲೆಯ ಆಡಳಿತ ವರ್ಗ ಹಾಗೂ ಸಾರ್ವಜನಿಕರ ಅಭಿನಂದನೆಗೆ ಮೆಚ್ಚುಗೆಯಾದಾಗ ನಮ್ಮ ಸಂತಸಕ್ಕೆ ಪರಿವೇ ಇರಲ್ಲಿಲ್ಲ ಎಂದು ಸಂತೋಷ ಹಂಚಿಕೊಂಡರು.

ನಾಟಕ ರಚನೆ ಮತ್ತು ರಾಗ ಸಂಯೋಜನೆ ಈ ಎರಡೂ ಕ್ಷೇತ್ರಗಳಲ್ಲಿ ತಮ್ಮ ಕ್ರೀಯಾಶೀಲತೆಯ ಮೂಲಕ ಹನುಮಂತು ಒಬ್ಬ ಯಶಸ್ವಿ ಸಾಧಕರು. ಯಾವ ಪಾತ್ರವಾದರೂ ಸರಿಯೇ, ಆ ಪಾತ್ರಕ್ಕೆ ಪರಕಾಯ ಪ್ರವೇಶ ಮಾಡಿ ಜೀವ ತುಂಬಿ ಅಭಿನಯಿಸುತ್ತಾರೆ, ‘ಬರಡಾದ ಬದುಕು’ ನಾಟಕ ಒಂದರಲ್ಲಿ ತೊದಲು ಹುಡುಗನ ಪಾತ್ರದಲ್ಲಿ ಅವರು ನೀಡಿದ್ದ ಅದ್ಬುತ ಅಭಿನಯ ಇವತ್ತೀಗೂ ನನ್ನ ನೆನಪಿನಲ್ಲಿ ಹಚ್ಚ ಹಸಿರು ಎಂದು ನೆನಪಿಸಿಕೊಳ್ಳುತ್ತಾರೆ ಅವರ ಸಮಕಾಲೀನ ಗೆಳೆಯರು.

ಸುಮಾರು ಎಂಟು ನಾಟಕಗಳನ್ನು ಬರೆದಿದ್ದಾರೆ. ನಾಟಕ ರಚನೆ,ಗೀತರಚನೆ, ಸ್ವರ ಸಂಯೋಜನೆ, ರಂಗ ನಿರ್ದೇಶನ, ಗಾಯನ, ಅಭಿನಯ, ಹೀಗೆ ವಿವಿಧ ಕ್ಷೇತ್ರಗಳಲ್ಲಿ ಬಹುಮುಖ ಪ್ರತಿಭೆ ಹೊಂದಿದ್ದ ಹನುಮಂತು ಅಂದಿನ ಸಂದರ್ಭದ ಸಾಂಸ್ಕೃತಿಕ ಶಕ್ತಿಯ ಸಾಕಾರ ರೂಪವೇ ಆಗಿದ್ದರು ಎಂದು ಅವರು ಹೇಳುತ್ತಾರೆ.

ಕಿರು ಪರಿಚಯ–ಎಸ್. ರುದ್ರೇಶ್ವರ, ಸಂಶೋಧನಾ ವಿದ್ಯಾರ್ಥಿ, ಬೆಂಗಳೂರು ವಿಶ್ವವಿದ್ಯಾಲಯ

 

(ರಾಮನಗರದ ಕೃಷ್ಣಸ್ಮೃತಿ ಕಲ್ಯಾಣ ಮಂಟಪದಲ್ಲಿ ಸಂಸ್ಕೃತಿ ಸೌರಭ ಟ್ರಸ್ಟ್‌ ಆಯೋಜಿಸಿದ್ದ ಸಂಸ್ಕೃತಿ ಉತ್ಸವದಲ್ಲಿ ನಟ, ನಿರ್ದೇಶಕ, ನಾಟಕಕಾರ ಹಾಗೂ ಗಾಯಕ ಎಚ್.ವಿ. ಹನುಮಂತು ಅವರನ್ನು ಸನ್ಮಾನಿಸಲಾಯಿತು)